कतारमा नेपाली कथानक चलचित्र "सपना हो की विपना" को शुभमुहूर्त

कतारमा पनि नेपाली चलचित्रहरुको छायाङ्कन एवं फिल्म निर्माणको क्रम बढिरहेको अवस्थामा फेरी अर्को नेपाली कथानक चलचित्र 'सपना हो की विपना' को अक्टोबर २४ शुक्रबार एक कार्यक्रम आयोजना गरी कतारको अलखोर पार्कमा नेपाल प्रवासी आदिवासी जनजाति महासंघ कतारका अध्यक्ष अमृत गुरुङले नरिवल फुटाई शुभमुहूर्त गरी सुरुवात गरियो ।


कतारमा दुःख पाएका नेपालीहरुको घटनालाई चलचित्रमा उतार्ने र गुरुङको संस्कृतिमा आधारित कथावस्तुलाई समेटेर निर्माण गर्न लागिएको यस चलचित्रको छायाङ्कन २५ प्रतिशत कतारमा र ७५ प्रतिशत छायाङ्कन नेपालको लमजुङ्ग, कास्की, तनहुँ, स्याङ्जा आदि जिल्लाहरुको गुरुङ बस्तीहरुमा गरिने कुरा निर्माता कृष्ण गुरुङले बताउनु भयो ।

भेष गुरुङ, रविन तमू, हर्क तमू, राजन तमू, जितु तमू, द्रोण तमू, कृष्ण तमू, टौमाया तमू आदि कलाकारहरुले कतारको छायाङ्कनमा अभिनय गर्नेछन् । अन्य कलाकारहरु भने नेपालमा निर्णय गरिने कुरा निर्माता भेष तमूले बताउनु भयो ।

कृष्ण तमू, भेष तमू र ओम थापा मगर निर्माता रहेको यस चलचित्रको गीत टङ्क लिम्बु र भक्त लुङ्गेली मगरले संगीत तयार पारेका छन् भने धेरै म्यूजिक भिडियोहरुको निर्देशन गरिसकेका अनुभवी निर्देशक अमृत थापा मगरले यस चलचित्रको निर्देशन गर्नेछन् ।

यस चलचित्रको ब्यवसायिकताका ध्यानमा राख्दै गुरुङहरुको संस्कृतिलाई संरक्षण गर्नमा थप मद्दत पुग्ने कुरामा आशावादी रहेकाले सबै नेपालीहरुको मन जित्न सफल र भरपुर मनोरन्जन दिन सक्ने चलचित्र बनाउन सफल होस् भन्ने शुभकामना उपस्थित अतिथिहरुले दिएका थिए । यसरी शुभकामना दिनेहरुमा कान्तिपुर साप्ताहिक प्रवास प्रकाशनका श्याम सुन्दर शशी, , तमू साँस्कृतिक परिवारका अध्यक्ष बिमल गुरुङ, तमू बौद्ध सेवा समिति कतारका अध्यक्ष जगन गुरुङ, नेत्र गुरुङ, बुधबल गुरुङ हुनुहुन्थ्यो ।

तमू संस्कृतिमा आधारित बन्न लागेको यस चलचित्रको कतारको छायाङ्कनमा भने तमू बौद्ध सेवा समिति कतारले विशेष सहयोग पुर्žयाउने कुरा तमू बौद्ध सेवा समिति कतारका अध्यक्ष जगन गुरुङ र तमू साँस्कृतिक परिवार कतारका अध्यक्ष विमल गुरुङले बताउनु भयो ।